Zogam 2015

Aki gelhni: Monday, 05 March 2012 00:53

Agelh: ZOKHUP

Bangzahvei kisimkhin: 188

Share

1 Comment

Mi tampi in 2015 kiim ciang Zogam koici ding in, um na hiam? ci in muhdaan kidong thei zel hi.

Apiangnailo thu a hihmanin, gen kholh lanlan theih bel bangmah omlo hi. Ahihhangin, tulai dinmun tawh enkop leng bel, alim alai khat bel kimu khol thei hi. Ahithei dinga anai pen bel anuai a bang ahihi.

2015 ciang Kawlgambup kiteelpina ( General Election) om kik ding ahihi. Tua thu in Zogam sung hong tok khengkhang dinga, mipi sungah zong amaugup tek buaipih ngeingai ding uh hi.

Zogam ah zong anuai a party teng hong om ding ahihi.

1.Zomi National Congress.
2 ChinNational Party
3.Chin Progressive Party.
4.Chin National Front
5.Kawl NLD
6. Kawl USDP

Leh adangdang hong om ngeingai dinga, Chin State Assembly leh Union Parliament a Palai ding ut in, hong kituh khengkhang ding uh ahihi. Kiteel kuan bang ciang, sa bang hong gogo ding uh a, niangtui bang hong hawm thithe ding uh ahihmanin, Zogam khawdo mah bang khenkhang ding ahihi. Gam le Nam itt vive hong hi ( hipak) ding uh ahihmanin, mipi te muhna ah khat le khat kibang sa lel ding uh a, a aw zolzol leh, nek leh dawn bawl tamna penpen, hong hat kha thei ding daan ahihi. Manipur leh Mizoram abat leh.

Zomi sung abawngbawng akhilkhil a vote hong zo'n sawm ding uh a, bawngbup, khilbup ngah cih bang om thei lo ding ahihmanin, Beh khat sungah zong ZNC bawng, CNP bawng, CPP bawng cihbangin, Zomi Bawng style thak hong om ding ahihi. Lamka lam bang ah tua bang vive mah ahihi. Behsung phungsunga amaulam apan pih lote "Thumanglo" ci ding uh hi.

Tuamah bangin pauke sungah zong gentehna in Saizangmi bang ahih leh CNP Saizang, ZNC Saizang, CPP Saizang cih bang in hong om ding ahihi.Tuamah bangin pauke dangsung zong tuabang hong hi ding ahihi.Manipur leh Mizoram khongah zong pauke base a khenkhat in politics a kimawl uh hangin, kiteelna hunciangin, khemzo tuanlo uh hi.

Gentehna in Mr. X in Y Pauke siksan in politic asiksan hangin, lawhcing keek leh zong, Y pauke bup enzo tuanlo hi. Tua lungkimlo in Y pauke honkhat alangah pang den uh ahihi. Chin State ah zong tuabangmah hong hilel ding ahihi.

Politics lam ah tuazah khong gen phot ni.

Development lam ah bel CNF leh Kawlmang Ceasefire om ahihmanin, 2015 masiah kum 2 sungkhong Kawlmang in CNF tawh Development nakpi in hong sem dinga, kum 2 sung khong thu akhangto suak ding mahbang in ki omngei ding hi. CNF te hong thau pian ding uh a, Chin Stae sung nasepna tampi amau tawh pangkhop lo a, hong hi theilo ding ahihmanin, mi tampi amaulam hong taipak ding uh hi.

2015 hong nai ciangin, CNF pen political party a din dingin, kawlmang in hong nawh dinga, party a kiregister kul ding hi. Amausungah a utlo a om leh phel 2 hong kisuah ding uh ahihi. Mundangah zong hidaan vive ahihi.

Election khit ciangin, telcing party te tungah mipi lam-etna hong lian mahmah dinga, ahizongin 2008 Constitution in gakcip ahihmanin, Parliament leh assembly ah ciak lala pong ding uh a, ahihhangin Kawlgalkap leh Kawl MP tengin aphal tan bek uh pia ding uh a, mipi taaksap teng hong hudim zolo dinguh ahihmanin, mipi hong lunkia dinga, Kawlgam pen angei mah hong bang kik lel ding ahihi.

Atawpna ciangin mipi hong lungkia piikpek dinga, 2008 Kawl Union tungah lam-etna bei in, khangthak te'n "takkheh" hongsa in, revolution pi taktak khat, hong puakkham kha thei ding ahihi.
Zokhup
www.zokhup.com