Microsoft Security Essentials leh Angkawm thu

Aki gelhni: Monday, 05 March 2012 00:25

Agelh: ZOKHUP

Bangzahvei kisimkhin: 185

Share

1 Comment

Nungkal sung unau Zanniat Zomi innkuan khat in, ka computer uh buai veh aw ci in, hong etsak dih ve ci hi. Ken thei tuanlo hiveng aw, ka cih leh hong etsak himhim inla, alai hong simsak in ci uh hi. Alailam zong abupi mah hiveng aw, ka cih leh kingah tuanlo hi.

Kei zong vapai pongin a inn uh ka tu'n ciangin, bangci a hia? ci a ka dot leh, inntekpu in computer hong khak phot zawzen in, tua khit ciang hong start kik hi, hibanga a ki hong ciangin hih lai dawk denkei in, maban kizom thei mahmah lo ci hi.

Kei zong ka et leh " Security Shield" cih khat dawk in ' Na computer dinmun lauhuai hi, na security upgrade in" ci hi. Limtak ka-et leh Anti Virus Scan daan khat dawk in, ki scan zalzal keei hi. Upgrade ding daan a kamek leh sum 50 val kisam ci hi.

Tua ciang hi bang khat kei zong tuakkha ngei ka hih cianga, na Antivirus uh ahinglai hia? ka cih leh, azi in nungkha January in bei khin hi, ki ngahngah lel ahihcianga, ka zatzat vua leh hong hici gawp ta ci hi.

Nungkuma a computer leilai vua, Antivirus pen Norton hemkhia a Vipre Antivirus ka thuahsak ngei hi in, kum khat license tawh ahihi. Kum thak a renew ding ciang hong gen un ka cih pen, amau lah mangngilh, ken lah mangngilh kha ka hi uh hi.

Tuabang kawmkal a Security Shield kici malware na lutman hi. Antivirus Company te contact lenglah, na antivirus sikhin pi ko tawh kisai keei hong ci dingin, hemkhia sak leng lah tampi hong la ding, Internet pia AT& T ko lenglah, online pan hong hepkhiat sak ding uh in, 124 khong bei ding ahih thu , ka gen leh tua zah bei ngaplo uh hi.

. Nungkum a khat a hibang mah a buai ngei in, internet service piate ka koh uh leh, agal pan hong bawl uh a, bang software tawh hemkhia peuhmah uh hiam? ci a ka et gige leh, Malwarebyte leh Spybot cih khat , online pan hong leisak in, tua khit ciang tuamah tawh hemkhia uh hi, a malwarebyte le Spy Bot lah hong piakhia tuanlo in, ahahsiang khit uh ciang, 120 val bill uh hi.

Malwarebyte leh Spybot hiam lei un, ka cih leh lah leinuamlo uh ahihmanin, Computer puahna ah kapai uh hi. Asai tu'n ciangin Security Shield vai kagen uh leh, asai neipa anuihza in, zingciang hong la un, 79 bei ding hong ci uh hi.

Nunglam a midang khat kapai pih lai in, Microsoft Essential cih khat thuah in, tua pen a Free hi hong ci ngei uh ahihmanin, tutung a te zong Microsoft Essential nong thuahsak thei dia? ka cih a leh, hi thei ding ci hi.

Microsoft Essential thu hong gen zek dih ve ka cih leh, Microsoft Essential pen Microsoft pan hi pah ngiat in, Window tawh kilem mahmah hi. Anti Virus bucing khat hi in, a mawkna a hong piakkhiat uh ci hi.

Nang e bangzang na hia? ci in kei zong hong donga, McAfee zang ing ci a kagen leh, McAfee in Computer giksak thei hi, MSE in bel giksak lo ci hi.

Inntung ciang Microsoft Website ka et leh, Free a download theih banah Anti Virus bucing khat na hi mawk hi.

Eimi innkuan khat a computer uh nitak nai 7 kiim ta a sia den in, AT&T te sam a kapuahsak kal uh, MSE ka thuahsak leh, computer hattuam takpi hi.

Kei a zong Macafee paikhia a MSE kithuah leh ka cih simsim laitak ahihi.

Nidanga Free Anti Virus ci a kitangko dente pen, va download in zang leng, tua pen akhauhpai lualo khong na hi in, anungcianga sumpiak nanga hong zolna khong uh na hi lel dih thei hi. AVG zong tuamah bang ahihi.

AT& T internet laleng McAfee Anti Virus a free a hong pia uh a, tua in computer gik le zekai sak takpi ahihi. Bestbuy khong pan computer leileng Norton leh Antivirus dang khong hong thuah pah uh in, tua pen kha 3-6 khong bek kidaih hi. Kha 3-6 zawh khit ciang sumpia a i lei kei leh, i computer ki songsolawi gawp thei ahihi.

I computer a Windows bawl Microsoft phualpi te'n, Microsoft Security Essentials ci a free a hong pia gegupi a, singdang ngai a Norton, Macafee, AVG leh adangdang khong, va kimuang kisuang kha niloh i hihi.

Politics a Zomi te'n i phungvuh ding ZIA nei gegu, Myanmar Army leh Chin Army kiang khonga i va angkawm duaiduai tawh kibang sak phing a om ahihi.

Microsoft Security Essential na computer ah na thuahnop leh na Computer a Antivirus khempeuh avekin paikhia gai phot in la, tua khit ciang hih laimun pan Microsoft Security Essentials download lecin, na computer in bitna leh khamuangna ngah ding ahihi.
Zokhup
www.zokhup.com