mu van lai

Theikhial kha ngel lehang kilawm

Aki gelhni: Saturday, 25 February 2012 12:38

Agelh: Hang Khan Lian

Bangzahvei kisimkhin: 474

Share

6 Comments

Zomi ulehnau,

Kawlgam kumpi leh CNA/F te'n holimna nei cih i zaakciang, Zogam bup mailam ding hih CNF te khut sung tung sa kha hilehang kilawm kasa hi.

Chin State bup mailam ding hihte khut sung ah aki-ap sakha ihihman in, hihte sung aa kihel kal ding ngaaklah aa kipal khaliang aa kidelh ngeingai hilehang kilawm hihang.

1. Kumpi in thautawi pawl tuazah tawh kiho thei khin ung cih amal(quantity) lak nuam ahihman aa CNF te ahopih hibek aa acihtaak ahihloh lam uh atheih zawh uh sawt bek hilo, nidang pekpek (Dr. Chum Awite kipeipei lai) aa kipan CNF te lam pan akutkut uhhang, " A kido, akikap ngei lah hilo, na thau tawi uh khia unla ong lut ziau lel vevua" acihsa uh ahihi.

2. Amau (CNF) makaite mahmah zong Zogam ah om nawnlo, gam tuamtuam ah avaak thap san khin uh, amin bek omlai hi aa, kumpi in kiho ding acihkik teh akikaikhawm kik uh hizaw laihi.

Tua bang dinmun kimlai, adiakdiak Zomi aa kilo sungpan hihbang aa ih delh, i kiphum sawm ngeingai teh khasiat huai kakisa aa, khat veivei, nuih zaak huai zong kakisa hi.

Khasiat huai kakisak na in, hihciang lawmlawm tello aa nungta ihihlam ong phawk thak sak aa akhasiat huai mahmah dinmun ihihi. Muan leh suan ding aa kilawm, taltaak mahmah hi-ing akici te nangawn in mun ngah ding, panmun hoih lazo ding kisa in naaklah liang in, kei Tonzang, kei Tedim, kei Cikha gam huam aitaang aa ong kuan hi-ing icih ngam zah ding aa ong zuau ngamsak ahihman in akhasiat huai ihihi.

Nam khat in gen lehang, hihzah aa panmun deih, mindeih, angsung thei cihding hi aa nuihzak huai mahmah leh zum huai zong kasa hi.

CNF ah lut kei ung, lah cibilbel, SC ah lah panmun la cihzong ahitheilopi khat hi aa, ahitakpi ihih khak phial leh zong, a zum huai dinmun hita hi. Pu GSKhup pau leh, "Pawlpi mi ahilo khat in Pawlpi upa sem thei ding hiam?"

Ataktak in hih CNF icihte pen Zogam ading tapa taimang dan hi aa, inn ong ciahkik lungdam, kimuak, kidawn hibek in innluahza akipia pah hizenzen lohi. Tapa taimang inn luahza kipia leh innngaak pipa koi ah kikoih ding hiam?

Zogam vai kikupna ah ong kihel thei uhteh cihna hi aa Zogam bup amau khut sung aa ki-ap ding cihna hizenzen lohi.

Aneu alian in Zogam bup aa thunei ding, Zogam bup ong uk pah ding sa kha ihih man in akimuhpih tawh, akinel tawh, akiphum sawm tawh a diang kheukho ihihi.

Ih dinmun niam, ih theihna kisam, angsung lianlua ahihman in ong haisak, ih mit ong huumsak hileh kilawm kasa hi. Hih tawmno khatte khut sung ah Zogam bup ap leh atam zaw thau tawi lo tul 70 val teng a pampaih ding a sakha zah hi lehang kilawmhi. Dah huai lai mahmah hihang.

Tutak Kumpi in minam min tawh ading state teng ei leh ei thuneihna ong piaksawm khin uh hihtuak zaw ta aa, piak ding veve metdawhna aa ong nei uh hilel hi. Hih tawh ong buaipih man sawm nawnlo, amau supna lianzaw ahihlam mu ta uh cihding ahihi. Ih deih kei zongin ei gamciat ah thuneihna ong pia ding uh aa, tua nangawn Zogam petmah simloh, state dangte ah Kawl atam zaw khin hi-in patau nawnlo uh cihna hita hi.

Kinel zawh thu, kiphum zawh thu, kimeltheih zawh thu, mai-et zawh thu peuh tawh mun leh za angah ding a sa lai, kalsuan zia thak a tel hetlo ihih lam kician mahmah aa, Kawlgam ciah zelzel ding kisam lehang kilawm hi. News paper khawng, journal khawng na sim zelzel dih un.

Mipi thuneihna ei sang CNF te'n theizaw uh ahihman in Statement ong lawn khia pah uh aa ei sang athu muh zawk na uh kilanghi.

Hih CNF te panmun apiak ding taak in ASSK kiteelna lut kul lo in mun pia lel ding uhhi. Tuabeek i ngaihsun kha hiam?

Tua ahihman in kituh taak kei, kineel taak kei, ki meltheih taak kei, mai et taak kei. Vote ong pia i mipite nangawn phawk kha nawnlo zah aa hihte kalsuanna i thukimpih khaak mahmah zong Topa deihna khat omphial leh kilawm kasahi.

Thukhat ah, Zomi sung aa makai utte i dinmun kitheihna, i lungsim puak kitheihna ong hibilbel in hoih sa-ing.

Makai pawlkhat bang, CNF sung aa thuuklut vetding aci zong om ci-in kaza kha liang aa, ka zumtha lahsuak, kadahtha lah suak peuhmah hi.

Hang Khan Lian
Block 640#11-59
Bedok Reservoir Rd
Singapore 410640