mu van lai

Satan biakna pan kikhel kik

Aki gelhni: Saturday, 25 February 2012 12:49

Agelh: TONGSAN

Bangzahvei kisimkhin: 201

Share

0 Comments

SATAN BIAKNA PAN AKIKHELKIK KHATPA THUGENNA

Nikhat ka lawmpa kiangah Denrite diik/nam dingin ka pai a. Ka lawmpain sabuai hong phahin, Aksi (star) lim gelh/suai in. Kei zong tua Aksi lim ka ginkual sak hi. Ka lawmpa in Kel luguh hong suah khia in, tua Aksi lim tungah hong koih in phuisam nuaunuau a, asawt loin vang(Pawer) hong nei hi, a ging lamdang khat hong ging henhan hi, TV pen remote control kuama let lohin ama thu in a channel hong kilai ziahziah hi. Tua banah innsung kawm gei a kikoih siksakol zong kuama khoih lohin hong kikhai vel val a. Kei zong ka khuasik mul hong tho sangsang ahih manin zu sai lam zuanin ka paikhiat san hi.

KA INNKUAN DINHMUN UH: Lamka khuapi sungah Lottery a minthan lai hi a. Ka pa in, ka nu zawllen san hi nitak lam a hong ciah ciangin, ka nu zu puakin a khamsak khit teh vak san vingveng zel hi. Ka u numei leh ka nau leh kei Boarding ah hong koih a, ka innkuan dinmun uh ka pa in bangmah hong hilh ngei lo ahih manin bangmah thei loin ka om uh hi. Inn lama ka ciah leh ka nu leh ka pa na kikhen siang uh a, ka pa in zi dang na nei khin ta hi.

Tua pan ka Innkuan sunguh nisimin siatna lam vive tawh kidim to in. Ka nu kik lah amau innkuan a khamtheih guih theih zang sa khat a hih manin, haksatna lianpi ka innsung uh ah hong tung hi. Ka lungkham lua ahih manin ki thahlup ding bekbek ka ngaihsun a, Ki-awklum ding maw?, Tem tawh kidawtlum ding?, Inn tung pan kikia suk sak ding maw?, aih keh tuili thukpiah lutsuk ding? cih khawng ka ngaihsun liang hi. A hi zongin ka pa tungah khasia lua ka hih man, ka pa tungah phuba lak kul sa in ka si nuam nai kei hi, ka lunggim luatna a noptuamna dingin Zatang RP, Alzolam, Nitro te ka ne a, zu zong ka dawn pah pah hi. Hih hun lai pen tan 9 (Cl-IX ) ka sim lai hi a, laisim zom thei ding hi nawn lo ka hih manin ka laisim ka tawp san hi.

SATAN KA BIAK PAT DAN: Ka inn sunguh nuamsa nawn loin, taimangna ding lah ka thei tuan kei a, ka lawmpa hilh bangin Aksi lim
ciamtehna ka gelh a, Satan kiangah thu ka ngen ngeu ngau hi. Tua lian leh ka tungah vaang (power) hong om in, nuam ka sa mahmah pah a. Tua hun lai pen kum 2004 kim hi in, kuamah in satan biakdan thei nai lo uh hi. Ko pawl pen mi thum bek ka hi uh a, Lamka khuapi sungah bel satan bia midang a om leh om loh thei kei ung. Hih banga kithoih a satan ka biak zel manun ka lungsim uh ah kha gilo in hong ompih hong uk to pah hi. satan ka biak cil lai un ka ut hunhun un ka kiho thei uh a, hong sawt semsem ciangin ka sunguh a om kha gilo in hong uk(control) cip hi, kithoihna ding hun leh munte zong amah’n hong hilh to zel hi.

Ka pawlcin deuhdeuh uh ciangin Zawhngeu leh Van Aksite zangin ka gamtatzia/dinmun dinguh ka kihilh thei uh hi. Ka vaangliatna (power) uh zangin Zawhngeute ka lawmte uh kiang thugen dingin ka sawl uh a, Zawhngeute in a kiang uh a om vante tangsak/ging sak hiamin va hilh a, Zawhngeu mit heek mitkhap dan panin ka kithoihna ding uh hun leh mun te ka kihilh thei uh hi. A cil lamin gan sisan tawh ka kithoih uh a, a hong sawt deuh ciangin komau sisan mahmah tawh ka kithoih uh hi.

KA KITHOIH DAN UH: A tangpi thu in zan kha taang nuaiah, zankim nai 12 hun pawlin ka kithoih den uh hi. Ka kithoih ding uh ciang a bem/kualin ka dingkhawm uh a, ka khut geek uh tem tawh at in sisan ka luang sak uh hi, tua ka sisante uh kuang sungah ka taak sak khawm uh hi, khatkhit khat tua banga ka hih khit uh teh a nunung pen ah ka makaipa(Leader)un ama khut geek mah at sisan in ko hih bangin a si kuang sungah taak sak hi, tua pan dawi la hong phuisam pah a ka kithoihna mun kim tenguh ka sisanuh theh hi.Tua zawhteh ka biak uh Satan thakhatin mihing bangin hong kilang pah hi, Pasal melhoih mahmah khat hi.

Tua pan ka kithoih kik uh a, Ka khutgeek uh at tawm kul nawn loin a mathuin sisan hong tak kelhkelh in kuangah ka dawh uh hi. A sawt loin ka at liam mate uh dam sit set pah hi. Ka kithoih zawh uh ciangin Satan in thupha hong pia a vaang (power)hong nei sak pah hi. A vaang (power) hong piakte bangbang hiam cih bel hong gen kei mai ning,a hoihna sangin a hoihlohna tam zaw ahih manin hong theisiam un. Satan in thupha vaang hong piak zawh ciangin guihtheih,khamtheih, zatui kisut, numei pasal ki duhgawhnate suakta takin kuama a tuam ci loin ka zang ziahziah uh hi.

Tua bang hun pen hanmual bekah hi loin innsung a lemna mun peuhah ka zang zel uh hi. Kei zi, kei pasal cih kuamah kideidanna om loin, thaanghuai lua mahmah ahih manin a gendan ding zong ka siam kei hi. Ka biak uh Satan nangawn in numei hong lut thakte luppih zel hi. Hi banga thanghuai taka ka gamtatna uh hang a naupaii a, a gai a om leh kithoihna in ka zang pahpah uh hi, khat vei vei naungek sisa khualak daikawm khawnga na muhte uh tua banga ka zat te uh hi kha ding hi.

KA MEMBER PIHTE: Tua lai takin Lamka khuapi ah member ka hau mahmah uh a, Satan bia tektek a migi leh a gilo pawl ka om uh hi. Kei pen a gilo pawl a leader khat ka hi a, Ka membersunga naupang pen kum 8 mi hipan hi. Lamka khuapi sungah Group 10 kim omin, member 2000 kim ka hih dinguh um ing. Manipur buppi ah bel Group 50 kim bang omin kithei ung. Ka membersunguh ah Pawlpi Upa, Sumbawl/mihau leh pilna nei lai siam mahmah, College le High School sang kah lai innkuan sung nupen leh papen zong tampi kihel ung. Khua leh Tui adinga kizang, migi mahmah dinga na upmawh uh nungak no melhoih mahmah zong tampi kihel ung. Tua banah pawlkhat ko laka kihel lian lo, Satan kianga kithoih den zong om lai hi.hi bangte sungah , Pastor/Reverend, Kumpinasem Officer lian pipite zong hi lai uh hi. Pawlkhatin Setanic pawla kihel lian loin, Kha gilo in a ukcip zong om hi. A hoihna sang a siatna lam ahih ding ka up manin hi hun laia ka member makai liante uh leh member dangte dangte min hong gen dah mai ning.

Member ka khan theihna dingun mi ka khem zel uh a, lawmhoih in ka bawl mengmeng uh hi, a innkuan sunguh ah haksatna hong om ciangin numei ahih leh numei ka sawl uh a pasal ahih leh pasal mah ka sawl uh hi, khamtheih lam zang dingin tha ka pia zel uh hi. Tua ciang khamtheih a zang het lo zong om ve ve ung. Hih ka member te uh a tangpi thu-in innkuan kithutuaklo/innkuan kisia (broken family) sung pan hi pen hi. Pawlkhat ahih leh Khristian hina pi Kha a om ding a um zo lo, Satan bia nuam zaw te zong hi in, Pawlkhat ahih l;eh Korea gama pai nop man peuh hi thei hi, exam passed nop man leh, sum kisap man, lungsim gim luat mana hong lut zong honkhat om hi. Ka pawl uh a hong lut theih nadingun khamtheih leh numei pasal kilunggulhna (Sex) lim zat pen ung.

KIMAKAIH DAN : Ka kimakaih dan uh pen tuampian mahmah hi. Group kimah makai, King leh Queen ka nei uh a, tua te nuaiah Leader om ciat in, tua banah member leh missionary ci bangin ka om uh hi. Ka Group leaderte uh a tamzaw Manipur pua lama Training dinga kuan laitakte zong hi. Tulianin Manipur pen zone 6 ah kikhen in;

1. Lanva lui dung leh a saklam Waterfall omna ciang.
2. Thangching mual area
3. Khawbon area (Silchar tawh kigamgi)
4. Chandel/Sugnu Area
5. Saidan mual pang
6. Dam leh Lamka Area

Satan biak dan leh Pasian biak dan pen a kibat lohna tampi om hi.Ko Satan ka biak ding uh ciangin ka sisan uh ka luansak masak uh kul hi.Tua zawh kithoihna zehtan ding tuamtuam(serh leh sang)ka zawh phet un a thaanghuai thei bang pen in suakta takin numei pasal nate ka zang khawm uh hi. Hun tomno sung nopna hong piak hangin lungmuanna taktak om thei lo hi. Ka biak uh a sawt deuhdeuh ciangin lawpna na leh nopna nei loin,eimah mahmah nuntak ding ki ut nawn loh ka kicimtak hun uh hong om hi. Satan in a ngim leh deih pen kan nuntakna uh hong laksak ding ahih manin tua bang lampi hong tawnsak den khat a na hi hi. Hihbang ka hih lai nangawnun lungsim tawngah sia leh pha theihna ka nei ve ve uh hi.

KHA TAWH KIDONA HI: Hih banga Satan biate pen thatang hat thu tawh khawl sak theih hi lo hi. A guk a hong zong a om leh zong
theihkholh theihna ka nei uh hi,ka kibuk man kei uh leh zong mit-a muh theih loh dinga kibuktheihna vaang(power)ka nei uh a. kigawt leh kisat a hoih leh kikhel thei ding zong ka hi kei uh hi.Satan bia khempeuh hawlkhiat khit ding ci leh zong hong kithei kim lo ding hi.A mel omdan leh a kizepdan pan zong kithei thei lo hi. Kei nangawn Satan bia te lak a Leader ka hih hangin,Biakinn a kikhop ka lawp mahmah a,ka Innsunguh ah zong thanuamin thumang mahmah khat ka hi hi.Tu lai a hanmual khawnga kithoih zel te pen hong lut thakte hideuh hi, a bia taktakte a kithoih lai kuamahin thei lo ding hi, a hang pen kuamahin a muh theih loh man hi. Satan biate do nadingin a lampi om sun pen kuama peuhin i tate ciat itna tak tawh Pasian tunga i ap tawntung ding hi pen hi. Lai Siangtho simna leh thungetna lo tawh a do dan ding dang ka thei kei hi.

LAMKA KHUAPI IN A TUAK DING: Tulai hunin Lamka khuapi pen Gulpi Power nuaia om a hi a, tua laitak mahin Dragon Power sam pawl zong om lai hi. Tua banah tunai diakin Mizorgam panin Satan power hat/khauh mahmah a nei, King leh Queen Lamka lam mite sapna hangin a hong lut zong om hi. Lamka leh a kim leh paam a kithoihna te pen sih theih lohna a neih nop man uh hi a. Satan in ahih leh ka sisan uh kham zo nawn lo hi,naupang sisan hong ngen pan ta hi.Sih theih lohna bel koi lak ah mu zo lo ding uh hi. Mihing sisan tawh kithoihna hong pat peuhmah uh leh bel Lamka khuapi nak siat mahmah ding hi hang. I tate ciat limtaka i kep kul ding hi. Hong thahlupsak kha ding uh hi.

Amau lakah mipil misiam tampi om ahih manin thuneihna hong tan peuhmah uh leh i gam, i minam in nak thuak mahmah ding hi. A ngimna lian pen uh khangnote suksiat ding hi pen hi, Khamtheih leh Sex zang a suksiat,Biakna pawlpi suksiat,natna sihna atam thei pen tun sak cihte hi. Pawlkhat Biakna pawlpi ah hong lut panpan ta uh hi, i do zawh nadingin i kigin kholh den kul ding hi. Hih pen Kha kidona ahih manin Pasian thu LaiSiangtho deihna tawh pangkhawma,Thungetna leh Pasian hatna Vaang muangin pang ciat/do ciat ni.Hibanga i pan kei leh i gam a hong tung ding a mulkim huai siatna ngaihsun hamsa ka sa hi.

KAM VAIKAK: Hih thu te ahoih lohna leh a kiman lohna theician ka hih manin,kei nangawn Pastor leh Pawlpi mite hong thunget sakna hangin hi Satan sal panin October 2011 in Pasian kiangah ciah kik in ka nuntakna buppi Pasian adingin ka ap thei hi. Tu-a ka lunggulhna lian pen hih Satan bia mi tampi tak ka lawm itte Pasian kiang zuatpih ding ka lungtup pen leh ka thungetna hi. A hi zongin,an nuntakna uh Satan in a uk khit manin thubaih lo ding hi cih ka thei hi. Minute khat/ nih sung bek zong a ut bangun om thei nawn lo uh a,amau thu leh la khat zong kizang nawn lo a Satan in a ut ut a a ukte ahih manun amau thu kizang thei nawn lo hi.

“My dear friends, please come to the Almighty God and find eternal peace. He is the only One who can give you what you are searching for. I searched for peace, riches, power and wealth by practicing Satanic sacrifices like you are doing now and I am not proud to be one of the pioneer in that field. If you happen to read this appeal, please come to God For he is ready and just to forgive our sins. I also appeal to all to help us free my friends from the clutches of Satan. I am forming a group called PENIEL GROUP. If anybody is interested to help us in the fight, please let us know through the writer of this article. Thank
you all.”

(Based on the interview with an ex-Satanic worship practioner leader who had accepted Jesus Christ as his Saviour and Redeemer) Source: Tongsan/Zogam Today