mu van lai

CNF leh Kawlkumpi kilemna (Ceasefire) tawh kisai World Zomi Congress pan thupulakna

Aki gelhni: Tuesday, 14 February 2012 10:09

Agelh: Admin

Bangzahvei kisimkhin: 371

Share

0 Comments

Chin National Front leh Kawl USDP kumpi kilemna (Ceasefire) tawh kisai World Zomi Congress pan thupulakna

Date: 10/02/2012

Zomi sungah gam leh nam ading kum 20 val vingveng khua-ul, sisan naisan, luang leh baan khaamin, a zuu ahaam thuakin guahnuai dainuai ah nasem Chin National Front te in Kawl USDP Regime kumpi tawh abeisa January 6, 2012 ni-in, Hiamkham / galkilemna (Ceasefire) hong bawl theih manun World Zomi Congress in lungdampihna leh muakna thu kapulak uh hi.

Kawl mite leh Kawlgam thu tawh kisai tangthu tuanthu i suut kik ciangin Febuary 12, 1947 kumin Independence lakhawm leng manlang zaw ding cih ngimna tawh Zogam leh Kawlgam in Panglong Thuciam kibawl hi. Tua Panglong Thuciamna sungah Zomi, Kachin leh Shan te'n ei le ei suaktatak ki-ukna (Independence ) ngah na dingin i hanciamna- ah ei bek tangpan sangin Burma tawh pangkhawm leng thahat zawin suahtakna kingahbaih zaw ding cih ngimna tawh beelpawlna kinei ahi hi.

Tua bangin pangkhawm hatna tawh Zogam, Kachin gam, Shan gam leh Kawl mite in British khutnuai pan suahtakna i lakkhop hangin, 1947 Constitution hong kigelh ciangin, Kawl mite in Zogam, Kachin leh Shan gamte deihna tawh kituaklo takin, 1947 Constitution pen thulanggelh in a mau khutnuai ah hong koih uh hi. Hih pen Kawl mite in a belpawlpih gamte tungah zuausan ( Betray) khatveina ahi hi.

Zogam, Kachin leh Shan gam te lungkimlo ahih manin, 1961 kumin, tua zuausan 1947 Constitution pen kipuahphat sawmin Shan gam Taunggyi khuapi ah khawmpi khat sam uh a, 1947 Constitution puahpha kik ding maw/ susia (phiat) vet a, liangko kikim gamte kibeelpawlna "Federal Constitution " khat gelhthak ding thukimna nei uh hi. Kawlgam kumpi in zong thukimpih uh a, March 1,1962 ni in Constitution vai genkhopna Yangon khuapi ah kinei kik hi. Ahi zongin Kawl minamte ultungna Burma Army in thukimpih loin, tua khawmpi thagumhatna suangin phiat kik uh a Zomi, Shan leh Kachin makai teng man uh hi. Kawlte ultunna 1974 Constition cih khat gelhtawm leuleu uh a, tua hun a kipan Zogam, Kachin leh Shan gam teng pen North Korea kumpi in amipite uh a uk bangin hong ukcip uh hi. Hih pen Kawl te'n a beel pawlpih gamte' tungah khembawlna /zuausan ( Betray) nihveina hi ta hii.

Hun hong pai toto in 1988 kum ciangin Non Burman minamte bek hilo in, Kawl mipite mahmah zong hong lungkim nawnlo uh ahih manin, mipi sosangna nasiatak hong om hi. Tua bangin buaina hong pian zawh 1990 kumin Kawl galkap kumpi in kiteelnapi khat bawl uh hi. Tua kiteelna tawh tawlkhat sung mual mite ( Non Burman) leh mipi teng lungdamsak pak uh hi. 1990 kum a kiteelkhia mipi palaite tungah thuneihna piakhia lo uh hi. Tua banah Kawlmite leh Kawl galkap ultungna/ deihna bek tawh 2008 Constitution khat hong gelhkhia leuleu uh hi. 2008 Constitution pen mipi teel ahi lo, amau zawhthawh thu leh golhguuk piaksa teng tawh bawl khia-in kipsak mawkmawk uh hi. Zomi sung pan zong mipi teel ahilo, mi pawlkhat bantang mat uh a, Zomi leh Zogam tangin khutpimek sak uh hi. Hih pen Kawlte in a beel pawlpih gamte' tungah a khembawlna / zuausan (Betray) thumveina ahi hi.

Hih bangin thumvei vilvel hong khem/ zuausanna uh ahi, 2008 Constitution siksan a kibawl 2010 Mee (Vote) guukna ( Rigging) tawh hong piang khia USDP galkap kumpi pen lungkim huai lo leh uphuai het lo hi ci-in World Zomi Congress in ciantak ka mu uh hi. Tulaitak a Democracy Party tuamtuam leh Mualgam galkapte kiholimpih ding azol kawikawinate uh zong USDP kumpite pen leitung in a thukimpih/ a pomna ding ngimna tawh akineihkhem uh ahi hi. USDP General Secretary U Htay Oo in agenna ah, " 2008 Constitution pen kipuahpha lo ding hi " ci in pulak khin ahih manin, tua 2008 Constitution apuah nuam lo USDP kumpi tawh hiamkham akibawlbawl uh hangin Kawlgam Democrecy le i ngaklahlah Zogam suahtakna ding lametna om lo hi ci in, World Zomi Congress in ciantak ka thei uh hi.

Tua ahih manin 2008 Constition tawh kituak hetlo tak a hong piangkhia USDP kumpi tawh Hiamkham (Ceasefire ) abawl CNF te pilvang huai mahmah ding banah CNF/CNA sanggamte World Zomi Congress in ka phawng/ kazasak uh hi. CNF-USDP Ceasefire tawh kisai World Zomi Congress in kilungdampih a, a hangin Zomi leh Zogam pianke'n hamphatna ahi " Zomi Right to Self-determination and Equality" liangko kikimna leh pianken mimal tanvote khahsuah lo a, i vengbit theihna ding ngimna tawh CNF-USDP Political Dialoque a bawl uh pen Zogam, Zomi leh Kawlmi Kawlgam kikal ah thuman/ thudik kilemna ( Ceasefire) hi lo hi ci-in, World Zomi Congress in kipompih zolo bek tham loin, khauhtak kinial hi. Zomi sung a om CNF party leh Kawl mite sungah USDP party kikal kiholimna bek hi zaw hi ci-in World Zomi Congress in muhna le ngaihsutna kinei hi.

Tua ahih manin Kawl minam leh Kawlgam in Panglong Agreement, Taunggyi Conference Thukhensatnate leh tulai a Zomi, Kachin, Shan leh Non Burman minam leh gamte deihna bulpi ahi " Equality leh Self-determination " tawh kisai a, 2008 Constitution puahphat ding (or) Constitution thak khat gelh phakik ding cih thu khat peuhpeuh USDP Regime kumpi in malakna hong neih ma tengin, Zomi ( Chin) leh Zogam (Chinland) buppi paulap in, mipi deihna tawh kituaklo Political Agreement khat peuhpeuh bawl hetloh dingin World Zomi Congress in CNF te akipan Zomi Political party, Organisation, Civil Society leh mipi khempeuh tungah hih WZC Thupulakna ( WZC Statement ) kong tangkokhia uh hi.

Information & Publicity Department
World Zomi Congress
HQ., Portland USA