mu van lai

Tualkhiang Naupang mangte kimukik ta!

Last Updated on Thursday, 08 March 2012 14:09 Written by Admin Thursday, 08 March 2012 13:53

Share

Kawlgam le Indi gamgi Cikha Township sung Tualkhiang khua pan abeisa March 2,2012 ni a Naupang 3 amangte ni 5 sung vilvel khuamite le khua kim khua pamte in a kizonpih khit nungah cihna ding thei nawn loin, lamet bei laitak in, Pasian huhna le kepna hang tawh March 7,20122 (Wednesday) ni nitak lam (2:00Pm) hun pawlin, Haiciin gam Haupi Kawl nisuahna lam, Tangha lui geiah Aisa sawk apai Haiciin khuami numei 2 in va mu kha uh hi.
Tua numei 2 te pen Haicin pan zingsang annek khit ciangin Tangha lui lam manawh in akuankhia a sun siah zong pua uh hi. Aisa sawkna uh pan nitak neh lam ciangin, naupang khat lui geiah a om mu uh a, “No, Tualkhiang naupang mangte na hi uh hiam? ci-in adot uh leh “ Himah ung," ci in naupangpa in dawng pah hi. Na lawm dangte koi laiah om hiam? ci in adot kawmkawm in a pai pheiphei uh le mun khatah na khawl liailuai uh hi” ci in, Haiciin khua nupi Nu Cing Vom in, gen hi.
Naupang 3 te pen a gil uh kial lua in, a ciling keelkeel uh ahih manin, Nu Cing Vom leh alawm nu in, a sun an puak uh a thum un pia uh a, an zong ne zo mel loin gim thei mahmah uh ci hi. Khe tawh pai zo ding gual hilo ahih manun, naupang aneu deuhte geel a nung vuah pua in, a lian pen pa akhut tawh kai hi. Numeite nih in athum un pua zolo uh ahih manin, Zanglo/tuilo ah lokuan Pa Lian Mang galsap in Pa Mang zong va pai pahin a lianpen pa pua in, TualKhiang khua va tun vingveng uh cih kiza hi.
Tua naupang thumte kiang ah, " tu sung teng koilai ah omin, zan giak na hi uh hiam"? ci-in a dot uh ciangin, " Ka giakna uh zong ka thei nawn kei uh a, nitum ciangin ka ihmu pahpah uh hi " ci-in, dawng kik uh hi. Tua bang tawh Tualkhiang khua a inn tung uh, a nu le pte innkuanpihte akipan khuanu khuapa khempeuh lungdam/ kipak lua in, lungdamna khitui kia ziahziah kawmin, na dawn uh cih kiza hi.

Hih Naupang 3 te a manna tungtang ah Haicin Khuami 30 valte in a va zonpihna pan un Motor tuahsiatna tuak uh a, Lamka lam Zatopi ah mi 6 bang kipuaksuak hi. Tua bang haksatna le lungkham mangbatna kawm kalah i Naupang mangte si le mangcip suak loin, Pasian in damna le nuntakna hong piaksak lai a, i muh kik manin a innkuanpih nu le pa, sanggamte le khua le tui tawh kibangin Tongsan Media pan lungdampihna i pulak hi.

Hih bang thu pen Zomite sungah thu lamdang nam khat mah hi dingin i lamen a, Zomite akihuh tuah minam i hihna zong tutung in kilang mahmah hi. Naupangte manzia tawh kisai le a maute mancip sungin a omna mun, bangne, kua in makaih cihte akipan theih huai thupi tuamtuam Thuthak kante in a banban in kansan laitak uh cih kiza hi.

Pu Kham Min Thang ( Tongsan Reporter of India)
New Delhi