Singapore ah innteng Housemaid te ki bawlsiatna hizel ei
- Aki gelhni: Monday, 12 March 2012 19:23
- Bangzahvei kisimkhin: 309
ZomiDaily :: Singapore gamsung ah innteng nasemding in apai gamdangmi te pen ki bawlsia (Abuse) omden cihpen ih theihtheihsa leh ih zakzaksa ahihi. Ahi zongin theipipi leh zangei pipi mahin nuntak khuasat hamsatna tawh Singapore ah innteng nasemding in ki paipailai veve hi.
Tunai inzong Singapore ah innteng nasem in aom Kawlgam mikhat kibawlsia cih kiza leuleu hi. Tuanu minpen Tin War War Khing kici ahih manin Kawlte hikhading hi. Akum pen Passport sungah 24 ci'n aki ciapteh hangin, akum taktak 16 bek phapan cihi.
Tin War War Khing pen a nasepna inntek te'n limbawlsiat mahmah uhhi. A maitang ah liamma, maimapawn vive dim a, akhut ahzong tuabang mahin aki kuikek meimapawn vive tawh kidim hi. A nungzang pan atawbo dongah tuisa kibuakna hangin apawn vive in tuamcip depdap hi. Inntekpa in Boot khedap tawh suigawp ahih manin lamzong hoihtak paitheilo hi. A luzang zong Coffee Mug tawh aki satna liam cilai hi.
Hihbang in Tin War War Khing pen a nasepna inntek te'n abawlsiat uh sawttuak khinta a, ahi zongin kuaman theikhalo ahih manin, innsungtawng khatah apumthuakthuak hihtuak mawk hi. Kamphatna tawh a innveng te'n atheih ciangin Police te sam uh a, Changi General Hospital ah February 22, 2012 ni-in Ambulance tawh napuakthei bilbel uhhi. Tuapan in anatna huaisia kisapian hiam Singapore General Hospital ah February 25 ni-in Transfer phei uh cihi.
Innveng hoih neihding athupitdan. Topa Zeisu in "Love your neighbor as yourself." ana cihcihpen hihbangdan ana muhkholhman hiluazen vencin. A innveng te'n Police te nasamkei mawkleh hih Tin War War Khing pen sipetmah mawkleh kilawm hi.
Hihbang zahliang in abawlsia inntek te Address pen hih: Block 702, #08-18, Tampanes Street 71 ci a, Singapore kumpi thuneite'n bangdan in dan piading cihpen kithei nailo hi.
Singapore aom adiakdiak in ZIS (Zomi Innkuan Singapore) tepen nopsa mahmah uh a, leitung leimongdong ah athu ala uh kiza vangvang hi. Ahi zongin Singapore gamah innteng aomkha tepen hehpihhuai, khasiat huai leh paihuailo cihpen Singapore gamah aomngiat Pa Pau Khan Thawn inzong hih "Singapore ah innnasem in a paidingte theihding" tengah hoihtak kiciantak in ong hilhcian, gencianngei khin hi. Singapore ah innteng Housemaid nasemding in ihpaisawm veve laihiam? ZomiDaily
No comments:
Post a Comment