mu van lai

Malaysia Zomi sungpan Muhkhiat Thupha!

Aki gelhni: Thursday, 01 March 2012 15:06

Agelh: Zokhai

Bangzahvei kisimkhin: 276

Share

0 Comments

Malaysia Zomite' tungpan-a Ciinding Thuhoih:

Tutung Malaysia-ah Zomi Nam Ni bawlna-a Zinmaang ding-in ZAM Upapite' thusiamna-tawh kava-hawh thei-a, Malaysia Zomite' sungpan-in Zomi buppi-in ciinding-a ahoih mahmah thupha pawlkhat ka' muhlehtuahte ka'hong hawmsawn dinghi.

ZAM leh ZAM Pawlhiang tuamtuamte-a kipan khua kipawlna tuamtuam kigawm-a haanciamna-tawh Zomi Nam Ni lopna Cup vaaihawm-in suihpeng/tukpeng kimawlna bawlzo uhhi. "Kimawlna bawlzo" cihziau mawk-pen agen ol mahmah, agensiatzong haksa hetlo, phatding ol, mawhsakding baih mahmah saam taleh vaaipi-khat aki matut nading naakpi-in avaaihawmte' ading-in haksa, buaihuai leh manlahna naakpi-in tam ahihlam kipawlna sung-a masuan nei-ngei khempeuh-in theikim dinghi. Zomi upate leh amipi mahmah naakpi-in ettehhuai diimdiam uhhi.

Tua suihpeng/tukpeng kimawlna-ah khua tampi (aneng-atawng-in ZAM Thupuak-ah om-hi) kihel diimdiam-a, kitot kilaaina peuhmah omlo-in tanzil gualbaan tak-in kimawl kimciat uhhi. Kimawlna-ah akihel khuate-mah pan-in pahtawina' a piakding medal-a kipan Cup leina, sumtang mahmah-tawh pahtawina piakdingte kidong/ki-khon ciat-in phunna pauna omlo-in kimang diamdiam-uh ahihman-in Zomi Kipawlna mazangsak, vaang neisak, thahaatsak ahihlam kimu thei-hi.

Khatna Pahtawina (Nguasing Khua)

Tukpeng kimawlna-ah ahaatpen khatna a-ngah khua-pen Nguasing Khua ahihi. Malaysia-a Zomi buppi ahitheizah kimawlna kidemna sung-ah khatna zahdong-a madawkna ahihkeileh khuadangte' lak-ah kidawk zawhna mawkpen naakpi-in angtanhuai mahmah-a, lawp-huai leh thangahhuai mahmah-hi. Tua zah-a a-angtanhuai madawkna-pen 2011 Zomi Cup-ah Nguasing Khua-in hong ngah ahihi.

Bangcibang-in khatna ngah uhhiam? Namtui mahmah-in limci mahmah phadiak-hi, banghanghiam cihleh;
Kimawlding kha-khat akisap hunlian-in akimawlding khuapihteng nasepna pan-in day-off ngen hilo, nasep khawl ngam ngiat uh-a, kimawl kisinpah ngiatngiat uhhi. Amaute-in nasep nusia-in kisinna aneih baan-ah gam thumna atung khinsa Nguasing khuapihte-in neekleh dawnding sikpah ngiat uhhi. Khuazaang-in pangkhawm uh-a, Zomi sung-ah kihelna sung-a madawk zawhding thupi laaksiam/ thupisaksiam mahmah uhhi.

Minam sung-a kihelna maimaiciang hilo-in kihel-a madawk zawhding thupi-hi ci-a ngaihsutna leh saanna nei-thei cihlimlim-pen naakpi-in thupi-a, etteh-huai ka' sa mahmah-hi. Malsim kiciantak-in gualsuk lehang;

• Minam buppi vaaihawm khawmna sung-ah kihelding thupi-hi ci-a saan siamna
• Minam buppi vaaihawmna sung-ah madawk zawhna a-angtanhuai ahihna theihtelna
• Minam buppi vaaihawmna sung-ah madawk nading-in thagui thatang, sumlehpaai leh hun manphate bei ngam-a haanciam theihna nampi lungsim
• Kipawlkhawm-a haanciam khopna pan-in gualzawhna anamtui alimci ngah zawhna

Hihteng naakpi-in ciinhuai-in ettehhuai ka' sa mahmah-hi.

Minam huampi-a vaaihawmna sung-ah kihel theihna ahihkeileh kihel nopna lungsim-pen khantohlam manawh nampi lungsim hi-a, "ei khua-bek, ei' beh, ei' innkuan, ahihkeileh kei-bek hithei lel hang-e/ing-e" cih namneu lungsim kaantan khinzo, gaalkah khinzo cihna ahihman-in thupi ka' sa mahmah-hi.

Tua zom-ah, minam buppi vaaihawmna, tualsung kipawlna-a kipan mi tampi-tawh vaaihawm khawmna sung-ah madawk nopna nam-nih om-a, ahoih leh asia om-hi. Pawlkhatte-in tuabang taangpi sung-ah kidawknuam mahmah, madawknuam mahmah napi-in sepding bawlding, kipiak nading, supding baaiding te-ah seem nuamlo, bawl nuamlo, sumh ngamlo, baai ngamlo-in amadawk dingbek mitsuan thei-uhhi. Tuabang mite atamna mun khempeuh-ah minam-sung kitukalhna-in suulzuih tawntung-hi, banghanghiam cihleh, seemlo, gimlo, tawllo, sumhlo, kipiakna omlopi-a madawknuam a-om ciang-in aseem abawl, agim atawl, asumh azaang mite ahihkeileh tuate' meeltheihte-in seemlo bawllo-a min ngahnuam, madawknuam mite mudah-uh ahihman-in ki-elna, kilangbawlna cihte piang pahpah-hi.

Madawk nopna ahoih-pen hih Nguasing Khua-mi I-laaizomte' kalsuanzia ahihi. Madawk nuam-in tu mawkmawk lo-hi. Tukpeng kisin midangte-peuh gensiasia, asiam lohna-peuh suutsuut selo uhhi. Nasep khawllawh liang-in pang uh-a, hun, thalehngal pia uhhi. Madawknuam maimai hilo-in sepna-tawh, suplawhna-tawh, kipiakna-tawh pangkhawm uhhi. Gualzawhna hong ngah takpi uhhi. Bangzah-in namtui-in deihhuai ahihiam! Seemngam, sumhngam, kipia ngam-a amadawk mite naakpi-in pahtaak-huai-a, naakpi-in ettehhuai ahihi. Zomi buppi sung-ah hih lungtang, hih nampi lungsim puakzia I-neih theihkim ciatding naakpi-in kisam dinghi.

Minam sung-ah kidawk zawhding lunggulh theihding kisam-a, atung-a ahoih madawk nopna namte-tawh haanciam ciatding minam khat sung-a mimal kimciat' mawhpuak ahihi. Seemlo bawllo, sumhlo pi-a dawk nopna-pen Zomi mimal kim-in paihkhiat zawhding naakpi-a haanciam ciatding ahihi. Aseem abawl, asumh azaang mi khat pahtawiding akilawm mahbang-in aseemlo abawllo, agimlo asumhlo mi-khat pahtawiding kilawmlo hipah-a, "vok-in seemseem, ui-in maanneek" cih thuhilhna taangthu I-khuplet zawhding thupi-hi. Zomi sung-ah pahtawi ding-a kilawm tampi a-om mahbang-in kilawm hetlopi-a pahtawina angah tampi-zong om-hi. Hihte' hang-in ki-elna, asialam-a kidemna leh kigaalbawlna ciangdong nangawn I-tun denkeeina tuhun-in khentel siam hun mahmah tading-in ka' seh-hi. Hih Nguasing Khua mite' lungsim puakzia-pen Zomi sungbek hilo-in leitung buppi alumlet minamliante' lungsim puakzia ahihi.

ZomiDaily Pupite:

ZomiDaily Pupite-zong naakpi-in ettehtaak leh angtanhuai ka' sakna ka'hong pualaak dinghi. Amaute' siamna leh cihtakna-in Zomite' angtanna lianpi khat ahihi. Khasum kipia hilo-a, website manding nangawn amaule-amau aki todelh-uh ahihi. Zii-nei ta-nei-mah hi uh-a, innkuanpihnei vive-mah ahi uhhi. Khattang, etding innkuanpih neilo bang-in ngaihsut hetlohding I-ki theisak phapha uhhi.

Amaute' vanzat: Camera leh Computers te amaule-amau' zontawm hi-a, siamna, sumlehpaai, thatang leh hun manpha tampi pia-in Zomi cih kammal kiukiau atawisaan nopna nampi lungsim-tawh mapang uhhi. Lamdang sak-huai zahdong ding-in sumh ngam, seemngam uhhi.

Zomi website lak-ah ahoihpen, leengla haupen, thuthang guanthuah kizenpen-a hong madawkna aziak Zomi ataangpi-in theician khollo-in ahiding ciangmah kisasa thei laai-hi. Hihbang-a hoihna lamsang-ah apenpen asuah nading-a amaute' siamna, supna leh hun manpha tampi apiakte-uh ki ciapteh sak khollo-a a-omding naakpi-in paammaih-hi. Akipiakkhiatna-uh lian-hi. Supna baaina-in nungzuih den-hi. Atawpna-ah madawk-in gualzawhna ngah-hi. Hihte ahiding ciangbek bang-in I-saan ziauziau man-in phalammanawh kidemna minam sung-ah piang theilo hiding-in ka' ngaihsun-hi.

Media lamsang-ah ZomiDaily Pupite' haanciamna leh kipiakkhiatna ziak-in Zomite-in gualbaan media kician khat anei I-hihi. Adiak-in minam leh thucin thutang lam-ah ZomiDaily alimcipen hong suak-a, biakna lamsang ahihleh Khitui Gospel website cihte-a kipan adang tuamtuamzong I-nei uhhi. Amaute (ka' theihkhial keileh) website bawl man-a sumlehpaai abeite khempeuh amau' neektaang mahpan-a akhenkhiat taitai-uh hi-a, asuplawh abaailawh vive ahi uhhi.

Minam' khantohna ding-in media lam-ah naakpi kisamlaai I-hihlam I-phawk kimciat uhhi. Hihte khempeuh abawl, agimpih, asuplawh mi manpha mihoihte I-neih bangzah-in kipaak-huai ahihiam!

Thukhupna:

Hihbangteng I-gelhsuk ciang-in deihna bulpi kitel khinzoding himahleh atom-in;

Minam' ading sep ngamna, sup ngamna, hunpiak ngamna, siamnate minam' phattuam nading-a dawksak nopna nampi lungsim, minam buppi vaaihawmna sung-ah kihelna thupi asa-thei nampi lungsim, haanciamna maantak-tawh madawk nopna nampi lungsim; hihte' tungpan-a anamtui asiangtho avaangpha Gualzawhna naakpi-in lunggulhhuai ahihna aki hawmsawn hi-ni!

Avaangnei madawk nopna-in minam phungcing sak ahihman-in avaangnei avaangpha, anamtui, alimci madawk nopna lungsim Zomi mimal kimciat tung-ah I-minam hongnei Pasian-in hong guan kimciat tahen!

Zokhai

***********************************************
T. Zokhai ITNA-IN GUABANG HINNA-HI
60 Narr-Maen Drive
Croydon Hills VIC 3136
Melbourne, AU
Tel: +61 39723 0460
Mob: +61 420 800 560