နေပြည်တော်မှာ တိုင်းရင်းသား ကိုယ်စားလှယ်တွေနဲ့ ဒေါ်အောင်ဆန်းစုကြည် ဆွေးနွေး
2012-03-06
နေပြည်တော်ကို စည်းရုံးရေးခရီးစဉ်နဲ့ ရောက်နေတဲ့ ဒေါ်အောင်ဆန်းစုကြည်ဟာ ဒီကနေ့မနက်က တိုင်းရင်းသားလွှတ်တော်အမတ်တွေနဲ့ တွေ့ဆုံပြီး တိုင်းရင်းသားအရေးကိစ္စ၊ ကြားဖြတ်ရွေးကောက်ပွဲကိစ္စ အတွေ့အကြုံဖလှယ်ခဲ့သလို တိုင်းရင်းသားတွေရဲ့ ဆန္ဒတွေကို မေးမြန်းဆွေးနွေးခဲ့တယ်လို့ ရခိုင်တိုင်းရင်းသားများ တိုးတက်ရေးပါတီ ဥက္ကဋ္ဌ ဒေါက်တာအေးမောင်က ပြောပါတယ်။
၂၀၁၂ ခုနှစ် မတ်လ ၆ ရက်က နေပြည်တော်တွင်
အမျိုးသားဒီမိုကရေစီ အဖွဲ့ချုပ် ဥက္ကဌ ဒေါ်အောင်ဆန်းစုကြည်နှင့်
တိုင်းရင်းသားလွှတ်တော်အမတ်များ တွေ့ဆုံနှုတ်ဆက်နေစဉ်
ဒေါ်အောင်ဆန်းစုကြည်နဲ့ တွေ့ဆုံတဲ့ တိုင်းရင်းသားတွေထဲမှာ ရှမ်း၊ ရခိုင်၊ ပလောင်၊ ပအို့ဝ်၊ ချင်း၊ ၀၊ ဖလုံစဝေါ် ပါတီက ကိုယ်စားလှယ်တွေ ပါဝင်ပါတယ်။ အဲဒီနောက် ဒေါ်အောင်ဆန်းစုကြည်ဟာ နေပြည်တော် ဥတ္တရာသီရိမြို့နယ်နဲ့ ပုဗ္ဗသီရိမြို့နယ်တွေမှာ ဟောပြောပွဲတွေ ပြုလုပ်ခဲ့ပါတယ်။
အဲဒီဟောပြောပွဲတွေမှာ မဲဆွယ် စည်းရုံးရေးတွေမှာ မလျော်သြဇာသုံးပြီး စည်းရုံးမဲဆွယ်တာတွေကို အကြောက်တရားကင်းကင်း ရင်ဆိုင်ကြဖို့၊ ပြည်သူတွေရဲ့ ချစ်ခင်မှုကို ပြန်လည်ရရှိအောင် အမျိုးသားဒီမိုကရေစီ အဖွဲ့ချုပ်ကို တပ်မတော်သားများ မဲထည့်ဖို့  ဒေါ်အောင်ဆန်းစုကြည်က တိုက်တွန်းပြောကြားကြောင်း ပုဗ္ဗသီရိမြို့နယ် အမျိုးသားဒီမိုကရေစီ အဖွဲ့ချုပ် ကိုယ်စားလှယ်လောင်း ဦးဇေယျာသော်က ပြောပါတယ်။ ဒါ့ပြင် ပညာရေးစနစ်ကိုလည်း အဓိကထားပြီး ပြောဆိုသွားကြောင်း သိရပါတယ်။
အဲဒီနောက် ဒေါ်အောင်ဆန်းစုကြည်ဟာ ပဲခူးတိုင်း တောင်ငူမြို့ကို သွားရောက်ပြီး အလုပ်လက်မဲ့ ဘွဲ့ရလူငယ်တွေရဲ့ အရေးကိစ္စနဲ့ ပညာရေးကိစ္စတွေကို ပြောကြားခဲ့ပါတယ်။ အလုပ်လက်မဲ့ ဆိုတာဟာ အလုပ်မရှိတာ တစ်ခုတည်းကို ပြောတာမဟုတ်ဘဲ ရှိတဲ့အလုပ်နဲ့ စားဝတ်နေရေး အခက်အခဲကို ဖြေရှင်းဖို့ မလုံလောက်တာဟာလည်း အလုပ်လက်မဲ့ ပြဿနာနဲ့ အတူတူပဲလို့ ဒေါ်အောင်ဆန်းစုကြည်က ပြောပါတယ်။
No comments:
Post a Comment