mu van lai

Zomi leh 2008 Constitution

Aki gelhni: Monday, 27 February 2012 22:50

Agelh: ZOKHUP

Bangzahvei kisimkhin: 63

Share

0 Comments

Zomi State Vai

Myanmar Colonial galkapte hong thaltulh, 2008 Nargis Constitution ah, State khatpeuh i min le puam i khelnop a leh, tua state sunga mipite deihna tawh kikhel thei ci uh hi.

Tua galkap constitution tungtawn in, Chin State pen Zomi State in laih ding hileng, Chin State mipi atawm pen alang val thukim pihna kisam ding hi. Chin State population pen sang 5 in tuat leng, sang nih leh alang 250,000 val i thukim pihna kisam ding ahihi.

Tua mipi referandum pen State Innpi ah kipualut leh, Innpi Palai alangval mah i thukimpihna kisam leuleu hi. Innpi ah township khat pan 2 ta kisawl ahihmanin, mipi palai 18 om dinga, atawm pen 10 thukim pihna kisam ahihi.

Tua palai 10 bangci ngah ding cih i et ciangin, Tedim, Tonzang pan 4 kingah thei dingin tuat leng, adang 6 ngah nang pen, township dang 3 or palai dang 6 in hong thukim kul hi. Tua ahihmanin 2008 Constitution tawh, Chin State min Zomi State a i khelnuam a leh, palai 6 or township 3 panpihna i zong uh kul hi.

2008 Myanmar Colonial Constitution ah anuaibangin kigelh hi.

Chapter I, Article 9 (C) ah,

State hiam Division hiam khat i min leh puam akikhelnop leh, tua state/division sunga teng, mipite deihna tawh kituak in, daan bawlna tawh kikhek thei hi ci in gelh uh hi.

If it is desired to change the name of a division or a state, it shall be done with the enactment of a law after ascertaining the desire of citizens residing in the division or state concerned.

Hih thu tawh kisai in Zomi te panlak ding theih daan nam nih om ahihi.

• 2008 Constitution lah nial ngamlo, Chin cih min zong deihlo kawikawi , Zomi a lah khelnuam taktak i hih a leh, tua constitution dungzui mah in ma kila thei hi. Kawlgalkapte gelhsa ahihmanin, hihvai nasepna pen lauhuailo ding hi. Tuabang mite a dingin hih pen chance hoih khat hi pah ahihi.
• 2008 Constitution deihlo,Federal leh Independence deih zaw, Chin lah deihlo, Zomi deihte a dingin zong, asiat luatna omlo a Federal or Independence Movement i kalbi khat mah zong hipah lel ahihi. Banghang hiam cih leh Zomi State sunga khawsa teng pen, adeih kei phial uh zongin, Zomi hikhinta hi.

Ahih leh Zomi hong deih pih din palai 6 koici zo'n ding?
Hih thu pen thagum leh ngalhat thu tawh hong piang theilo dinga, Kawlte maibiak zawh thu tawh zong, apiang thei ding thu hilo cih theih masak kul hi. Hih tungtang ah Thein Sein leh Aung San Suu Kyi te'n zong thuneihna neilo uh ahihi.

Tua ahihmanin Zomi pihte mah a thu leh atak tawh, thutak leh namtui tak a zawh ding kisam hi. Hakha leh Thantlang Township sungah Lai sangin Zo tam zaw uh a, tuate tawh ki-uitui zoleng palai 4 kingah thei ding hi. Tua banah Matupi Township sungah "Zotung" kuampi khat om a, tuapan zong palai 1 suakkhia thei hi. Adang khat pen nakpi a zong kul dinga, Falam lam hiam, koi hiam khat pan sawkkhiat kul ding cihna ahihi.

Hih palai kisam lai 6 pen give and take bawlna bek tawh kingah thei ding hi. Eilam pan bang piakhia ding cih bel, kiging kholh mahmah kul ding cih thu bek omlai hi.

Atunga i gensa mah bangin 2008 Constitution pen, Zomi Identity a ding beek a, izatngamloh or izatnopkei a leh bel, Zomi tawh kisai i maban pen, mailam ah Zogam Galkapte khutsungah i ap hong kul kha thei ding ahihi.

Zokhup
www.zokhup.com