mu van lai

CNF/A te'n Tedim-Tonzang ah zum hohloh nading laikhak

Aki gelhni: Wednesday, 01 February 2012 08:40

Agelh: Rev. Zam King Mang

Bangzahvei kisim: 80

Share

View Comments

Dear lai sim teng,

Zomi Association of U.S. pan in Tedim-Tonzang gam ah CNF/A te in zum hon loh na ding in CNF/A makai te leh Chin State kumpi te tung ah lai ki khak hi.

Mipi in i ngaih sut ding leh i sep ding tampi om lai cih ong phawk sak nuam ing. Atom in ong kumnuam ing, akicing zaw in Kawlgam Kumpite laihawm tadensa te ah na sim le uh cin Kalwgam vai tampi ki tel ding hi.

1. Kawlgam kumpipa U Thein Sein in ASSK tawh thukim na a neih khit ciang in America kumpi akipan,nitumna gam teng leh UN te in Kawl kumpi te vai hawm na hoihsa in thu kim pih uh hi.

2. Kawl kumpi in thautawi kumpi lang pang Kayin, Shan, Mon etc teng tawh ki lem na bawl uh hi.

3. I. Dawl khat na, State level ciang thuki kup na leh thukim na bawl uh hi.
A. Kikap nawm loh ding (ceasefire). CNF leh Chin State Government te hi phot hi.
B. Thau tawi lo in khual zintheihna ding.
C. Kizop na ding zum hong ding.
(CNF/A te in Thantlang gam ah zum zon ding phal na ngah uh aa, ahi zong in Tedim-Tongzang ah zum hon ding vai pen tung siah lam ah akhuan ngen lia uh hi.)

Tulaitak aa ii buai thu pen, CNF/A te'n Tedim- Tonzang ah zum hon loh ding vai ciang bek hi in, hih thu ciang bek tawh khawl ding maw, anuai a maban te ah bang ci ngaih sut na nei i hiam?

4. II. Dawl nih thuki kup na. (Hih hun ciang a ding Zomi ten bang ci gel khol ding.)
5. III. Dawl thum thukikup. (Naypidaw level)

Tulaitak i buai pih pen number 3. I. Dawl khat na ciangbek hi. dawl II & III te ah maban ding gelna ngaihsutna te kikum to lai ni.

Topa thupha.

Zam King Mang
Chairman
ZAUS

Mipi te deihna in Zomi Nam Ni

Aki gelhni: Wednesday, 01 February 2012 08:34

Agelh: Hau Thang

Bangzahvei kisim: 122

Share

 :: A kum (64) cinna Zomi Nam Ni hongtung ding hita hi. Leitung muntuamtuam gamtuamtuam atung Zomi khempeuh sung pan Makai upate'n Zomi Nam Ni bawl zia ding, amun, aphual dingte, Ngeina lam namtuamtuam, Ngei na la aw nam tuamtuamte Minam puan ih neih nam tuamtuam te, Minam vai ah Zomite masuan nasep zia lam hil/lamlakna Thutangkona (gamthu, pilna thu, sumbawlsum zuak thu) nam tuamtuam te neiding in thasan in sun in zan in ih mulo hun hi ta hi.

Pianna Zogam ah ahih leh Minamni cih ding pen nung kha in ngetna om zo napi Zogam PM in sang zo nailo hi. Delhi ah Meetting pai CNP pan Pu Zozam in azenzen kei-in PM asem hizen leng mipideihna zui in Minamni ci-in kabawlsak hamtang ding hi cihi. Ka Za akiat leh kiat, mipi deihna kamang dinghi cihi. Zomi gam State PM in asan zawh loh zenzen hang Tedim CCJ khawmpi ah Dr Enno in "Katuntun na ah Zominam ni ka bawlding hi" cih kiciam sak zo ahihi. Malaysia ah GZA khawm pi hun in Dr Cin Sian Pau in"Zomi Makai te cih bangbang mang in kazui dinghi" ci-in kiciamsak leuleu hi.

Kawlgam ah kumpi Thein Sein nangawn in mipi deih na mang in Irrawady gun tui dal pi khawl sak hi. Mipi deihna leh getna bang in gilbeem om ahonhon alomlom in lungnopsuahtak na pia zo ahihi. Hihbang hun in Gilbeem om te nangawm lungdam in awngziahziah in aom hun lai tak in, ih Zogam ah Zomite gilbeem sung om lah hilo suakta tak in Minamni bawl theilo ding tawh kibang ahihi. Mipi gilbeem khuazing sung om te suahtak kipiak laitak hun in Ei Zomi tezong mipi deihna zui in lungnuamtak in MINAMNI hun ah nuih sak hun ahihi.

Kawl mangpa in ami te lungkimsak nuisak ziahziah, Lungdam thu gingziahziah sak a,ahih man mivom mikangte leh Leitung na gawn in kipakta hi. Zo Mang pa in ahih leh amipih aminam nuisakzo nailo,milungdam kohkoh hun in hong kitheih mawh bawl in Zogam munkhat ah zomi hong bu cip sak ahihi.

Hih bang kong gelh khiat na in Kawl gam khua hun kikhelna zui-in mipi deihna kalsuan nop na leh Workshop on Media Development in Democratic Society om zo ahih na zong ahih

Kachin galtaite Huhna (KRRF) kipiakhia ta!

Written by Admin Tuesday, 31 January 2012 18:56

Share8

KACHIN GALTAITE HUHNA ( KRRF) PIAKHIATNA VAI PULAKNA

A tung a thulu tawh kizui-in, abeisa June 7,2011 ni akipan Kawl galkapte le Kachin galkap (KIA) te' kikapna hangin Kachin mipi 60000 kim inn le lo nusia in, singnuai gammual ah galtai/ dongtuak in om cih i theihsa ahi hi. Tua i sanggam dongtuakte Zomi min tawh huh zawhna ding ngaihsutna kinei-in, Zomi bup aitangin World Zomi Congress pan Kachin Refugees Relief Fund Committee kiphuankhia in Innteek semin leitungbup ah tangkona i nei hi. Hih KRRF huhna piakkhiatna tawh kisai anuai abangin tomkim le limlakna (Photo) pawl khat navawh (Attach File) ah muhtheih/ simtheih dingin kong koih uh hi.

Zomi min U leh nau akua maciat in itna le lainatpihna takpi tawh i piakkhiat sum kingah vekpi US$ 13013.95 pen January 28,2012, Saturday ( 6:30PM-8:00PM) sungin Vickery Baptist Church, Dallas, USA ah WZC makaite le KRRF Committee te in Kachin kipawlna makaipite' khut ah piakkhiatna hunpi nuamtak kinei thei hi. Hih bangin mihing genthei, cimawh le dongtuakte huhna ah neihsa sum le paii, tha le ngal akipan lungsim pumpi mahmah tawh mapang Zomite khempeuh WZC pan KRRF Committee min tawh lungdamna lianpi kong pulak uh hi.

Hih bangin Zomite i mapankhop ciangin Pasian hong piak thuphate i zeeksiamna le i kipumkhatna hong kilangkhia ahih manin, tu le atawntung in midangte le i biak Pasian ading nasem khawm zo semsem dingin Topa'n thupha hong pia ciat hen!  Tua bek tham loin, tutung a i mapankhopna tungtawn in namdangte in ZOMI min athak in hong theihpih semsem bek tham loin, i biak Pasian zong lungkim semsem dinga, Zomite thupha ngah minam hong kici semsem ding hi. Minam dangte tung pan huhna a ngenngen minam hi nawn loin, minam dangte tungah huhna a pia zo tawntung dingin Pasian in thupha hong pia behbeh lai ding hi. Nasep hoih sep ding cimtak ngei kei ni.!

KRRF huhna piakkhiat( ap-na) hun sungah WZC pan maikaite le KRRF Committee ahithei teng banah Dallas Zomi pawl khat zong kihelthei hi. I sanggam Kachin Kipawlna lam pan zong a zahtak huai makai thupi vive hong kihelthei uh hi. Sia Mungtawng ( Lasa siam) in hun hong kem ( Chair person) semin Zomi apai teng leh Kachin lam pan hong pai teng tawh, KRRF sumte kipiakkhia ( Ki-ap) ta hi ci in, pulakkhia in khutbetna tawh hun honna kinei hi. Pu Thang Lian (WZC-GS) in WZC dinmun (political stand), KRRF mapanna leh Kachin te leh Kawlte kikal ah Zomite ngaihsutnate a tomkim cing takin pulakna nei in tha kingah mahmah hi.

Tua banah Pu Thang Lian in WZC i dinpih, ngimna le tup bulpite le maban kalsuan zia ding pawl khat anuai a bangin pulakna nei hi.

(a) WZC in Zomite'n a bukim suahtakna ngahtheihna ding hangsan tak le citak takin ka phu ding uh hi.

(b) WZC in Zomite lamsang/ domsang, cing leh kemin, Zomite ngahhuai (rights), kitualvaihawmna leh,mimal tanvo( Rights) ngahna ding kasem ding uh hi.

(c) WZC in Galtai dongtuakte don leh kem in ka honkhia/ panpih ding uh hi.

(d) WZC in Zomite khantoh nang, hauhna , daihna le nopsakna dingin ka sem ding uh hi.

Tua banah KRRF nasepna tawh kisai a genna ah, " sanggam Kachin numei, naupang, pitek, putek dongin Kawl kumpite in cikzia lo takin abawlsiatna le a thahna, inn leh lo suhsiatsakna ,Kachin numeite buanna cihte khempeuh Zomite in Kachin mipite tawh kibangin kong lainatpih, kong thuakpih uh hi. Hih bang a gamtatsia Kawl gamkeekte Zomibup in nasiatak in ka mawhpaih uh hi. Na haksatna uh ka zak uh ciang in WZC in Meeting kinei-in, leitung bup a om Zomite khempeuh kiangah thuzasak in, KRRF min tawh nasep kipankhia hi. Tua banah Kachin te leh Zomite Unau khat hihna thute hangin minam dang bangin ngaihsutna nei loin, sanggam laizom taktak in ngaihsutna kong nei uh hi " cih thute genkhiatna nei hi.

A tawpna ah Kawlgam Union of Burman pen Kachin,Shan,Chin leh Kawlte in,Panglong khawmpi pan kithukimna belpawl gamin dinkhop ding lungkimna hong om ciangin,Union of Burma hong piangkhia ahihna thute gen hi. Tua masiah,ei leh ei ki-uk,kivaihawm thei ziau minamte i hi hi. Tua ahih manin hih Panglong lungsim pua in, minam le gam itna takpi tawh gentheih/ haksatna na thuaknate uh kong lainatpih mahmah uh hi. Tua mah bangin mai lamah ko, Zomite in zong tu aa mah bangin mapankhop theihna khempeuh ah thasial het loin,i ngah ding aa kilawm ngahhuai (Rights) muhmatan no tawh a kibang in kong panpih ding uh hi " ci in gen hi.

KRRF Committee pan Pu Cinpu Zomi (International Co-ordinator) in thugenna aneih khit ciangin KRRF sumte Dallas pan Lia Lalun tawh piakkhiatna nei suak pah uh a,Kachin lam pan Cultural and Traditional Committee pan makaipi huh Sia Htingnan La Sam leh Secretary Sia David Lahtaw te in zong thugenna nei ciat uh hi. Kachin Lam pan Sia David in Kachin galtaite' haksatna leh gamvai a genna ah, " Kachin  dongtuakte pen khawl ding lam manawh nai het loin, tam lam manawh semsem zaw ahih manin, mailam ah zong hahsatna a phu toto lai ding ka hi uh hi. Tutung laizom Zomite in nong huhnate uh dongtuakte ka zaksak uh ciangin lungdamin, thangah mahmah ding uh hi " ci in a thangahna le lungdamkohna thugen hi.

Kachin lam pan Vice President Sia Htingnan La Sam in zong thugenna tomno nei a, " Kachin te in hih banga Kawlgamkek gal ka do uh pen, Kachin mite ading bek hilo in, Kawlgam mualtung mi khempeuh tangin galdo ka hi uh hi. Kawlgam ah Panglong thukimna om ma in ei leh ei asuakta i hi hi. Tua Panglong thukimnate Kawlte in hong awlmawhsak nawn lohna hangin, hih bangin haksatna le buaina kithuak a hihi. Tua ahih manin hih i ngahhuai (rights) te i ngah masiah Kidona tawh kisai kikhawllo ding hi ci in gen hi. Tutung Kachin galtaite vai ah Zomite in nong panpihnate uh Kachin leh Zomite tangthu ah a bei ngei nawnlo dinga, kiphawk tawntung ding ahi hi ci in gen hi. Atawpna ah Dallas khuapi sunga om Vikery Baptist Church ah Pastor Jimmy Gallagner in hunzawhthungetna nei-in, a paikhawm teng khukdinin Kawlgam hoihna ding le Kachin gamah kilemna hong tunna dingin thungetna kinei hi.

Hun man khit ciangin Pu Thanglian te inn, Dallas ah Behte tawh thu tuamtuam holimna leh tutkhopna hun nuamtak neikhawm kik uh hi. Kachin makai lamte in a genna khatah Gam sung a om ka mipihte uh lungdam mahmah hi. Dollor pek khat nangawn mannei mahmah in mikhat zing leh nitak an ding hong lungmuang sak hi ci-in,a lungdamna uh leh i huhna sumte manpha asakna thute gen phapha uh hi. Tua ahih manin, tutung laizom Kachin galtaite i huhna hangin Zomite thupha ngah kipatna le kipumkhat kipatna hi dingin WZC lametna le thungetna ahi hi. Zomite khempeuh Topan hong makaih hen.

Zomi khempeuh tangin,

KRRF Committee,

World Zomi Congress

Headquaters,

Portland, USA

CNF/A vai Tedim a kiim le paam Hausate holimna nei

Written by Admin Wednesday, 01 February 2012 01:43

Share7

Zogam Tedim, Tonzang, Cikha Tsp. tengah CNF/A te in Liason zum hong ding cih thukizakna hangin gam sung gam pua a om Zomi kipawlna tuamtuamte le hausa upate akipan a kua maciat kilunghimawh ciat hi. Tua bang a kilunghihmawh laitak in, tulaitak a ZRDP makaipi Pu Vum Za Nang makaihna tawh Kawlpi pan Zomi makai pawlkhat tawh Tedim ah pai uh hi. Tedim khuapi le akim le paam a om khua tuamtuam pan Hausa upate tawh January 31,2012 ni-in Tedim khuapi Sia Thangpite inn ah hausa 30 valte tawh kimukhopna le holimna nasiatak nei thei uh cih kiza hi.

Tua hun sungah Pu Vum Za Nang in thu kong honna nei in, Tedim khuapi ah CNF te in zum ong hon ding a deih lo teng khut lam sakin,a kihel hausa khempeuh in thukimlohna khutlam khin uh hi. Holimna sungah kihel hausa upa, khuanu khuapate mimal khat ciatin thugenna nei ciatin, ngaihsutna le muhzia kibang khin thei lo zong om hi. A diakdiak in CNF/A in Tedim, Tonzang le Cikha gamte ah zum hong ding hi le nidang a Zomi hausa upate le nautangte hong thatsakna hangin Phu kila nuam dinga, buaina lianpi piang zaw lai dingin genciat uh cih kiza hi.

Pawl khat Tedim khua sung aa, khua nu/pa pawl khatte bangin CNF te thei ngeilo mawk uh ahih manin, pawlpi min a sakha zong om mawk uh hi.  Kikupna hunah kihel khate thangah thei mahmah uh ci hi. Hih Meeting ah akihel thei lo hausa khua kim teng ah zin kawikawi dinga, vaisian mateng vakkhiai pai kawikawi lai ding hi.  A hi zongin vaite a mansiang khit ciang in, Nypyidaw ah puak ding in,thukimna kinei hi.

Tua ahih manin,l tulaitak Zomite' buaipih mahmah ahi CNF/A vai tawh kisai kikupna ah CNF te tatsiatna hang a, sihna manna athuak i hausa upate le mipih te pawl khatin luangman nget ding leh,, a thatsa uh i sanggamte gamtatna te khempeuh a khuakhua ah min sazian kaikhawm in, Zomi bup min tawh laibu khat sawm dingin thukimna kinei cih kiza hi.

Source: Voice of Zom